الناس الكل شفتوه الظلم الليلة.
ريتوا ما أقساه؟ ريتوا ما أمره؟ ريتوا قداش يوجع؟ ريتوه كيفاش يقلب كل شيء؟ كيفاش يقلب الحق باطل و الباطل الحق و كيفاش يرد الخاسر رابح و الرابح خاسر؟ يرتوا قداش ما اقساه انهم يربحوك مش لانهم افضل منك بل لان عندهم شكون وراهم يظلم و يعمل الي يحب لا حسيب و لا رقيب؟ ريتوا ما اقساه كي يكون الحكم خصم؟ حسيتوا الناس الكل بمرارة الظلم؟ ريتوا قداش يتملى قلب المظلوم و كيفاش يوصل بيه الشعور بالظلم باش يعتدي على الحكم؟
ثمة برشا ناس ما خسرتش ماتش كورة بسبب الظلم. ثمة برشا ناس خسرت حياتها و عائلاتها بسبب الظلم و القهر. بسبب ان القاضي خصم مش حكم.
الظلم جرم. الظلم ظلمات. الظلم دمار و خراب. الظلم يدمر عائلات و يسقط دول و امبراطوريات.
الظلم يثير شاهية الانانيين و المغرورين فيلقوا المبررات باش ياخذوا حقوق غيرهم لكنهم ما يعلموش انه في نفس الوقت الي قاعدين يربحوا فيه في حكاية تافهة بأساليب ظالمة قاعدين يغرقوا في مجتمع كامل باش يطيح بيهم.
الظلم ظلمات. الظلم ما يدمرش المظلوم فقط . الظلم يدمر الظالم و المظلوم و بلدان و امبراطوريات.
الي يحب الخير لبلاده قبل ما يفكر ياخذ حق غيره قبل ما يفكر يكذب قبل ما يفكر يسرق قبل ما يفكر يعتدي قبل ما يفكر يرتشي قبل ما يفكر يزور قبل ما يفكر يغش يحط نفسه في مكان غيره.
الي يحب الخير لبلاده ما يظلمش و يحفظ حق غيره.
