نشيد العفو التّشريعي العام شعر رضا الماجري

شعر رضا الماجري

1

تونسْ طالتْ لَيّامْ 

دَمْعِكْ عَبِّرْ عَالخافي 

عَفْو التّشريعي العامْ 

في صُلْحِكْ ماهو كافي 

2 

جاك خْبَرْ الماماتْ 

وِابْدوكْ بِالخِيانَه 

كي غدْرو سي فرْحات 

جيناكْ للجّبّانَه 

قُلتِ صَفْحَة وِطْواتْ 

وِاقْبِلْتِ فيه عْزانا 

عَفْوِكْ زين الصّيفاتْ 

يا خضرة يا حنّانَه 

شَدِّتْ لَخْبارْ بْعيدْ 

جابِتْ سيرةْ بن يوسفْ 

فاحتْ تُنْقصْ وِتْزيدْ 

تَحْكي عَالغدْرْ وتوصفْ 

لا فْرِحْتِ بْيومْ العيدْ 

لا لْبسْتِ ثُوبْ جْديدْ 

حِمْلِكْ ماشي ويزيدْ 

دَمْعِكْ عَبّرْ عَالخافي 

3

تونس أمّْ الفاظِلْ ساسي 

تِمْشي لقبْرو كُلّْ صْباحْ 

تْصدِّقْ خُبْزَه لِتَّماسي 

وْتَقْرا صُورَه لْفَتْحي فْلاحْ

تونس تُسْكُن في قَعْفورْ

تونس بِنْتْ البَرَكاتي

دَمّي غَدِّرْ سَبْعَه سْطُورْ

وفي التّحْقيقْ وْفِتْ حْياتي

سِكْتو حَبْسو لَنْفاسْ

تْشامو عْلَيَّ بِالرّاسْ

خَبّو جُرْحي عَالنّاسْ

دَمّي عَبِّرْ عَالخافي

4

تُونسْ دَمعِتْ إنْسَانْ

صابِرْ تَحْتْ السّجّانْ

ناحِتْ باها الوِدْيانْ

مِالرّومي لِلْغيلانْ

أَوْلادِكْ في لَحْباسْ

بَدّعْ باها العَسّاسْ

لا ثْنيّه لا كَيّاسْ

لا قُفَّه لا قُرْطاسْ

في الكُدْسْ رْجِلْ وْراسْ

أَنْهِضْ حَيِّي الحُرّاسْ

لا دُوشْ و لا باياسْ

كانْ السِّيلونْ الحافي

5

تونس مَكْتوبِكْ خانْ

وانتِ مازِلْتِ صْغيرَه

ياما تْحَمِّلْتِ احْزانْ

عِشْتِ في ظْلامْ وْحيرَه

تونس زينْ البُلْدانْ

في وَحْشِكْ قَلْبِي تْهانْ

وِجْهِكْ ماشي وْيَزْيانْ

كُحْلِكْ عَبِّرْ عالخافي

وَحْشِكْ في القَلْبْ حْمِلْ

شَيّعْ حَتّى لِكْتافي

خَضْرَه وتَرْفَعَنا الكُلْ

طَبْعِكْ يَغْلِبْ وِتْصافي

شعر رضا الماجري

سي فرحات : هو الزّعيم النّقابي فرحات حشّاد 

بن يوسف : هو الزّعيو صالح بن يوسف 

الفاظل ساسي : هو شهيد أحداث الخبز عام 84 

للتّماسي : لتحيّة المساء 

فتحي فلاح : شهيد ثورة الخبز عام 84 

البركاتي : هو نبيل البركاتي شهيد التّعذيب من مدينة قعفور 

تشامو : أي أومؤوا برؤوسهم

الرّومي : هو حبس الرّومي

الغيلان : هو قصر الغيلان

الكدس : هو النّوم الجماعي للمساجين على الأرض

باياس : هو سرير السّجن

السّيلون : هو السّجن الإنفرادي

كحلك : هو الكحل الذي تزيّن به النّساء أعينها